Кыргыз Республикасынын Министрлер Кабинетине караштуу Жарандык авиация мамлекеттик агенттигинде Борбордук Азиянын региондук байланышын жакшыртуу программасынын алкагында Дүйнөлүк банктын өкүлдөрү менен жумушчу жолугушуу болуп өттү. Талкуунун негизги темасы Кыргыз Республикасынын жарандык авиациясында көзөмөл системасын модернизациялоо боюнча долбоорлорду ишке ашыруунун алкагында техникалык жана уюштуруучулук камсыздоо маселелери болду.
Талкууланган темалар:
- көзөмөлдөө ишин автоматташтыруу үчүн аппараттык жана программалык каражаттарды сатып алуу боюнча техникалык шарттар;
- инспекторлорду даярдоо үчүн техникалык шарттар;
Жолугушуунун жүрүшүндө башкаруу, отчет жана маалыматтарды талдоо процесстерин автоматташтыруу үчүн арналган атайын программалык камсыздоону жеткирүүгө даярдыктын жүрүшү жөнүндө маалымат берилди. Система агенттиктин бөлүмдөрүнүн ишинин натыйжалуулугун жогорулатат жана эл аралык стандарттарга ийкемдүү ыңгайлаштырылат деп күтүлүүдө.
Дүйнөлүк банктын өкүлдөрү бардык жабдууларды жана программалык камсыздоону бирдиктүү санариптик инфраструктурага эрте интеграциялоонун маанилүүлүгүн баса белгилешти. Ошондой эле инспекторлорду даярдоо программасын талдоону аяктоо зарылчылыгы өзгөчө белгиленип, банк тарап долбоорду колдоого даяр экендигин билдирди.
